Оқыту барысында әр түрлі өңірлерден келген мамандар теориялық және практикалық сабақтар арқылы білімдерін тереңдетіп, заманауи зерттеу әдістерін меңгерді және олардың іс жүзінде қолданылуын үйренді. Бағдарлама тек дәрістермен шектелмей, қатысушылардың нақты жұмыс жағдайларына бейімделуіне мүмкіндік беретін тәжірибелік сабақтармен толықтырылды.
Оқыту шеңберінде тыңдаушылар азық-түлік базарларына барып, онда ветеринариялық-санитариялық сарапшылар жануарлардан алынатын өнімдерге сараптама жүргізу тәртібі туралы кеңінен баяндады. Мамандар ірі және ұсақ малдың ұшаларын, сондай-ақ балық өнімдерін қарау әдістерін көрсетіп, санитарлық нормаларды сақтау мен кәсіпкерлермен өзара әрекеттесудің маңыздылығын атап өтті.
Сонымен қатар, қатысушылар Инновациялық Еуразия университетіне барып, онда ветеринария ғылымдарының кандидаты, доцент Урюмцева Татьяна Игоревна экскурсия жүргізіп, ветеринариялық-санитариялық сараптаманың өзекті мәселелері бойынша дәріс оқыды. Тыңдаушылар университеттің зертханалық базасымен танысып, заманауи зерттеу әдістерін және ветеринария саласындағы озық тәжірибелерді меңгерді.
Бағдарламаның қорытынды кезеңінде қатысушылар тестілеуден өтіп, кейс-міндеттерді сәтті шешті. Бұл олардың жоғары білім деңгейін көрсетіп, алынған дағдыларды кәсіби қызметте қолдануға дайын екендіктерін дәлелдеді.
