Жаңалықтар

Қазақстан Республикасы Ветеринария қызметкерлері күні аясында Республикалық ветеринариялық зертхананың барлық облыстық және өңірлік филиалдарында салтанатты марапаттау рәсімдері ұйымдастырылды. Бұл іс-шаралар эпизоотиялық тұрақтылықты қамтамасыз ету, жануар текті өнімдердің қауіпсіздігін бақылау және жануарлар денсаулығын қорғау жолындағы мамандардың еңбегін мойындаудың айқын көрінісі болды.

Филиал директорлары РМК «Республикалық ветеринариялық зертхана» бас директоры Елшібаев Темірхан Амантайұлының атынан қызметкерлерге келесі марапаттарды табыстады:
• Құрмет грамоталары – кәсіби шеберлігі, жауапкершілігі және ветеринариялық зертханалық қызметтің дамуына қосқан үлесі үшін;
• Алғыс хаттар – адал қызметі, бастамашылдығы және мекеменің басым міндеттерін іске асыруға белсенді қатысқаны үшін.

Сондай-ақ бірқатар қызметкерлерге «Еңбек даңқы» I, II және III дәрежелі төсбелгілері табысталды. Бұл марапаттар көпжылдық адал еңбегі, кәсіби саладағы ерекше жетістіктері мен кәсіподақ қозғалысының дамуына қосқан үлесі үшін беріледі.

Салтанатты іс-шаралар ветеринария саласы мамандарының маңызын айқындап, қоғам назарынан тыс қалып жатса да, ауыл шаруашылығының тұрақты дамуы мен қоғамдық денсаулықты қорғауда олардың еңбегі аса қажет екенін тағы бір мәрте көрсетті.

Республикалық ветеринариялық зертхана әрбір қызметкерге өз ісіне адалдығы, жауапкершілігі және кәсіби шеберлігін жетілдіруге ұмтылысы үшін алғыс білдіреді. Марапаттар – тек құрметтің белгісі ғана емес, сонымен қатар мекеме басшылығынан бастап кәсіби қауымдастыққа дейінгі барлық деңгейдегі жоғары бағалаудың көрінісі.